పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడనేల?
శనివారం – (6-5-23) వేకవ కాలపు శ్రమదాన విశేషాలు - @2759*
చల్లపల్లి స్వచ్ఛ – సుందరోద్యమంలో విశేషాలన్నీ సశేషాలే! 2-3 వేల వేకువ సమయాల – మూణ్ణాలుగు లక్షల – పని గంటల - సగటున 30-40 మంది శ్రమదాతల - ఏదో పనీ - పాటూ లేక కాదు – గ్రామ సమాజ కర్తవ్య నిష్టాగరిష్టుల కృషిలో విశేషాలకేం కొదవ? అట్టివానిలో కొన్ని:
- నిన్నటి నిర్దేశిత బైపాస్ మార్గ శుభ్ర – సుందరీకరణమే ధ్యేయంగా బ్రహ్మకాలమైన 4.15 కే 9 మంది HDFC బ్యాంకు దగ్గరకు చేరిక;
- నిముష క్రమంలో మరో 18 మంది కలయిక;
- అక్కణ్ణుండి నారాయణరావు నగర్ ప్రధాన వీధి దాక గంటన్నరకు పైగా స్వచ్ఛ కార్యకర్తల అపూర్వ శ్రమదాన దృశ్య మాలిక;
- దాలిపర్రు గ్రామస్తుడు బొందలపాటి శివ నాగేశ్వరావుతో బాటు హైదరాబాదు నుండి చుట్టపు చూపుగా వచ్చిన 10 వ తరగతి విద్యార్ధిని - వర్షశ్రీ నుండి చల్లపల్లి వీధికి దక్కిన శ్రమ వేడుక;
- బురదో, ఎంగిలాకులో, ఎన్నెన్ని రకాల కశ్మలాలో.. వేటికైనా సిద్ధపడిన ముగ్గురు డాక్టర్ల, సర్పంచి కుటుంబీకుల శ్రమదానోద్యమ ప్రవేశిక!
- మరొక విశేషం – అగ్రహార ప్రముఖ వీధి బైపాస్ రోడ్డు మీదికి దిగే చోట నలుగురు సుందరీకర్తల గట్టి కృషితో బాటసారులకు, వాహన చోదకులకూ సౌకర్యాల అమరిక!
- ఇక అన్నిటినీ మించిన విశేషం – కాంట్రాక్టర్ నాదెళ్ల వేణుకు ప్రభుత్వ ఖజానా నుండి ధనప్రాప్తి!
- అలాగని, ఆరేడు మంది కార్యకర్తలు నాలుగైదు గజాల పురుగుడు తీగల చుట్టను ట్రక్కులోని కెక్కించిన దృశ్యం తక్కువదేమీ కాదు!
అసలీ పనులన్నిటికీ తూర్పు నుండి సూర్యనారాయణుడూ - పడమర నుండి అస్తమయ పూర్ణచంద్రుడూ ఒకేమారు సాక్షులుగా నిలిచిన మరొక ప్రాకృతిక విశేషం!
నాదేం పోతుంది - ఎన్ని పేజీలైనా నింపగలను –
ఇక 6.30 సమయపు సమీక్షా సభా విశేషాలు:
1) కృష్ణకుమారి - రాజేంద్రల తనయుడి నీలేష్ కృష్ణ జన్మదిన వేడుకను స్వచ్ఛ కార్యకర్తల సమక్షంలో జరపడమూ – ఆ మంచి సందర్భంలో స్వచ్చోద్యమ ఖర్చుల నిమిత్తం 1000/- విరాళమూ - సదరు జన్మదిన యువకునికి శ్రమదాతలందరి ఆదరాభిమాన పూర్వక ఆశీస్సులూ, స్వీట్ల పంపకమూ
2) డంపింగ్ యార్డులో సిమెంట్ రోడ్డుని వేయించి, శ్రమించిన, నేటి ఆర్థిక విజేత - నాదెళ్ల వేణుకు అందరి అభినందనలూ
3) ముక్కూ - మొహం తెలియని ఊరి వీధికి స్వచ్చ సేవనందించిన వర్షశ్రీకభినందనమూ
4) DRK గారు సమీక్ష నడుమ - ఐదారేళ్లనాటి కార్యకర్తల కఠినతర మురుగు పనుల్ని గుర్తు చేసి ఆశ్చర్యపోవడమూ వంటి విశేషాలెన్నో!
రేపటి - ఆదివారపు శ్రమదానం కొరకు బైపాస్ వీధిలోని నారాయణరావు నగర్ ముఖ్య వీధి దగ్గరే కలుద్దాం!
స్వచ్చోద్యమ ప్రయత్నం!
ఒద్దికగా – పద్ధతిగా - పూదోటల ఉద్ధృతిగా
దోమ – ఈగ - మురుగు కంపుతో నిండని గ్రామంగా
కులమతాల కుళ్లు లేని గొప్ప సమాజంగా ఈ
చల్లపల్లి నెట్లైనా సరిదిద్దాలనే గదా!
- ఒక సీనియర్ స్వచ్ఛ కార్యకర్త,
06.05.2023.