పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు వాడదగునా?

10-5-23 నాటి స్వచ్ఛోద్యమ పని దినాల వరుస సంఖ్య 2763^*

            బుధవారం సైతం అష్ట సంఖ్యాక కార్యకర్తల పని వేళ 4.16 నుండి 6.05 నడుమే! వాళ్ళకు మరో 10 -11 మంది మాత్రమే తోడయ్యారు; ఊళ్లో వార్డుల సంఖ్య - 20 కన్నా కూడా నేటి శ్రమదాతల సంఖ్యే తక్కువ!

            అందుకొక చిన్న కారణం వాతావరణమైతే, పెద్ద కారణం – బాగా ముమ్మరించిన పెళ్లిళ్లు!

            పని చేయక కూర్చున్నా, నించున్నా చెమటలు దిగ కారే ఉక్క సంకట స్థితి! ఇక గంటన్నరకు పైగా కత్తుల్తో, దంతెలతో, వంగీ - కూర్చోనీ - డ్రైనుల్లో దిగీ - డిప్పల కొద్దీ పనికిమాలిన పిచ్చి, ముళ్ల మొక్కల్ని నరికీ గుట్టలు పేర్చీ - ప్లాస్టిక్ వంటి ఎంగిలి పదార్థాలను ఏరీ - శ్రమించిన స్వచ్ఛంద శ్రమ ప్రదాతల సంగతి చెప్పాలా?

            వాళ్లు ఈ వేకువ ఆగింది సాగర్ టాకీసు మూలమలుపులో! పూనుకొన్నది రెండు భవంతుల, కట్టెల దుకాణాల 50 - 60 గజాల బైపాస్ దారి వ్యర్ధాల పని పట్టడానికీ, సుందరీకరణం సంగతి తేల్చడానికీ, రోడ్డు కూడలి సౌకర్యాలు పెంచడానికీ!

            వీరిలో - ఎవరెంత చెమటలు కార్చినా, మాటిమాటికీ మంచి నీళ్లు ఖర్చుపెట్టినా, కళ్లు - ముక్కుల మీదికి జారే స్వేద బిందువుల్ని తుడుచుకొంటూ, నా లెక్క ప్రకారం ఊరి కోసం శ్రమ తపస్సు చేస్తూ నేటి తమ లక్ష్యాన్నందుకొన్నారు!

పని వివరాల్లోకి పోతే:

1) రోడ్డు రెండు ప్రక్కలా అడితి వారు కాబోలు - దాచిన సిపాయి నిచెన్ల అండ చూసుకొని - ఇటీవలి వర్షాలకు గుబుళ్లుగా – ఏపుగా పెరిగిన, అల్లుకొన్న గడ్డినీ - తీగల్ని తొలగించిన ఆరేడుగురూ,

2) బాట మార్జిన్లలోనూ, మురుగు కాల్వల అంచుల్లోనూ బలుస్తున్న మొక్కల్నీ, డ్రైనులోని అన్ని రకాల ప్లాస్టిక్ వ్యర్థాల్నీ అంతు చూసిన ఐదారుగురూ,

3) నాల్గు రోడ్ల కూడలి వద్ద – గడ్డి చెక్కీ, అంతకుముందొకమారు సరిజేసినా రెండు ప్రక్కలా పడిన గుంటల్ని పూడ్చీ, చదును చేసి పాటుబడిన నల్గురు శ్రామికులూ,

4) బాట నూడ్చిన చీపుళ్ల వారూ, సకాలంలో బండెడు వ్యర్థాల్ని డిప్పల్తో ఎత్తి - మోసి ట్రక్కులో నింపిన లోడింగు ముఠా....

            ఎవరు మాత్రం అభినందనీయులు కారు? పంచాయతీ వల్ల సాధ్యపడక - ఎవరిళ్ల ఎదుట వాళ్లు శుభ్రపరుచుకొనక - తమ వీధిలో - దుకాణాల, ఇళ్ల ముంగిట వేరెవరో శుభ్రపరుస్తుంటే పట్టించుకోక - పేరుకుపోతున్న మురికిని నిర్లక్ష్యం చేస్తున్న కొందరు గ్రామస్తులు మాత్రం గుర్తించదగిన వాళ్లు కారా?

శ్రమ సందడి ముగిసి, కాఫీల సరదా గడిచి, 6.25 కు జరిగిన సమీక్షా సభలో:

- కార్యకర్తల అరుదైన శ్రమదానాన్ని సమీక్షకుడు ఆశ్చర్యపూర్వకంగా గుర్తించడమూ,

- శివబాబు నామక కార్యకర్త గ్రామ స్వచ్ఛ శుభ్ర - సౌందర్య సంకల్పాన్ని నినాద రూపంలో ప్రకటించడమూ,

            మన రేపటి వేకువ పారిశుద్ధ్య కృషి కోసం సాగర్ టాకీస్ మూలలోనే కలువాలనే నిర్ణయమూ.....

శుభమస్తు - విజయోస్తు - నిర్విఘ్నమస్తు!

స్వచ్చోద్యమ చల్లపల్లి సమరాని కవిఘ్నమస్తు!

బ్రహ్మకాల శ్రమదాన ప్రస్థానం శుభమస్తు!

గ్రామ స్వచ్ఛ – సౌందర్యాకాంక్షలకును విజయోస్తు!

నవవసంత అవిశ్రాంత దీక్షకు నిర్విఘ్నమస్తు!

- ఒక సీనియర్ స్వచ్ఛ కార్యకర్త,

   10.05.2023.