పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకెన్నాళ్ళు?
సర్కిల్ ఇన్స్పెక్టర్ వారి కార్యాలయ శుభ్ర సుందరీకరణం @ 2971*
ఈ ఆదివారం (17-12-23) నాటి వేకువ 4.19 - 6.48 నడిమి శ్రమదానం చాల రోజులు గుర్తుండిపోతుంది. 39 మంది మంది స్వచ్ఛ కార్యకర్తల, పది- పన్నెండు గురు పోలీసుల ఉమ్మడి కష్టంతో సుమారు 10 సెంట్ల ఆవరణ 90 శాతానికి పైగా కాలుష్యం నుండి విముక్తి పొందింది! ఈ నెలలో శ్రమదాతల బలం 50 ని మించడం ఈ పూటనే!
అసలీ శ్రమదాన కార్యక్రమంలో వింతేమంటే-చిన్నపాటి మార్పుల్తో ప్రతి వేకువా వాడేది చీపుళ్లే, ప్రయోగించేది కత్తులూ, -- దంతెలూ - గోకుడు పారలూ, డిప్పలే, కాని దగ్గరగా ఉండి చూస్తే మాత్రం ఏ పూటకాపూట శ్రమ వీరుల్లో సృజన శీలం – నూతనోత్సాహం- క్రితం రోజును మించిన సంతోషం! బహుశా ప్రతిఫల మాసించరు కనుకనే ఈ ఉద్యమకారుల్లో ఇది సాధ్యపడుతుందేమో!
రెండు బలీయ శక్తుల కలయికతో ఏ నూతనోత్సాహం వెలువడుతుంది, ఏ శుభ సంకేతమిస్తుందో ఈ 2 గంటల కాలంలో గమనించాను. ఊరి స్వఛ్ఛ- సుందరోద్యమంలో రాటుదేలిన స్వచ్ఛ కార్యకర్తలూ + శరీర దార్డ్యం, చురుకుదనం కల రక్షక భటులూ కలిసి చేసిన ప్రయత్నం వివరిస్తాను:
ఆవరణంతా శుభ్రంగానే ఉండేదేమోగాని భారీ వర్షాలకు గడ్డీ- పిచ్చి కలుపూ, తీగలూ, తుఫానుకు రాలిపడిన ఆకులూ, కొమ్మ రెమ్మలూ కలగలిసి, అలుముకుపోయి, కార్యకర్తల సహనాన్ని పరీక్షించాయి! ముఖ్యం గా పొట్ల- బీర చెట్ల పందిరి క్రింద వంగొని, తడి మన్నులో కూర్చొనీ చేసిన పనులు!
40-50 మంది పూనుకొని పని చేస్తుంటే - వీధైనా, కార్యాలయ ఆవరణై నా చూడ ముచ్చటగా మారక తప్పుతుందా? పనుల ఉద్రిక్తతో మహిళల చీరలకు బురద అంటుకొన్నా, చలిలో కూడ కొందరు పురుష పుంగవులకు చెమటలు పట్టినా, ఇద్దరు మోకాళ్ల మీద కూర్చొని గడ్డీ చెక్కినా- పని ఆగలేదు!
6.00 దాటాకనే జరిగిన చెత్త లోడింగును చూసి తీరాలి! 15 మంది కొమ్మల్ని చెలిగి, దూరంగా మోసి, డిప్పల్తో ట్రాక్టర్ దగ్గరకు చేర్చి, ఇద్దరు వాహనమ్మీ ద నుండి త్రొక్కి 2 ట్రక్కుల వ్యర్ధాన్ని ఒక్కదాన్లోనే సర్దిన దృశ్యం శ్రమ సౌందర్య చిహ్నం.
6.40 సమయంలో పోలీస్ ఉన్నతాధికారి Ch. నాగ ప్రసాద్ గారి నినాదాలు, దేశంలో ఎక్కడా లేని శ్రమదానం ప్రత్యక్షంగా చూసి, పాల్గొన్న ఆనందాశ్చర్యాలూ, కోడూరు వేంకటేశ్వరు ని 520 /- విరాళమూ, పోలీసు రక్షణ మీద శేషు ఆలపించిన పాటా – తదుపరి అందరూ కలిసి భోగాది వాసు కు పరామర్శా , ఇళ్లకు చేరేటప్పటికి 7.30 సమయమై ఉంటుంది!
గంగులవారిపాలెం వీధిలో దశాబ్ది శ్రమదాన పండుగ కోసం మనం బుధవారం వేకువ గస్తీ గది దగ్గర కలుద్దాం.
నేల విడిచి సామెందుకు
నేల విడిచి సామెందుకు - గాలిలోన మేడెందుకు
అమాంతముగ సమాజాన్ని ఉద్ధరించు కబుర్లేల ?
మూడు వేల రోజులుగా మొండిగా సొంతూరి కొరకు
శ్రమిస్తున్న వారి తోటి చేయి కలప వచ్చును గద?
- నల్లూరి రామారావు
సీనియర్ స్వచ్ఛ కార్యకర్త,
17.12.2023.