పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు ఇంకా వాడాలా?

ఐచ్ఛిక శ్రమదానం 2975^* కు చేరుకొన్న వేళ!

            అనగా - గురువారం (21-12-23) మన్నమాట! 4:15 AM నుండి 6:12 దాక – తొలిగా డజను మందీ, క్రమంగా మరో 20 మందీ పోలీసు క్వార్టర్స్ లో చేసిన కష్టం సద్యః ఫలితాన్నిచ్చింది ! సివిల్ డ్రస్ లో ఉన్న నలుగురు రక్షక భటుల శ్రమ బాగా కలిసొచ్చింది!

            రక్షక భట నివాసావరణలో - ముఖ్యంగా రైతు బజారు వైపున - 15 సెంట్ల ఖాళీ స్తలం ఉండవలసినంత శుభ్రంగా కాక - ఉండదగనంత అక్రమంగా ఉండెను. ఎన్నో తుప్పు పటిపోతున్న చిన్నా –పెద్ద వాహనాలు, అందులో కొన్నిటిని పూర్తిగా మరుగుపరుస్తూ పెరిగిన మొక్కలూ, తీగలూ, వాటికి తోడు ప్రాత ఇసుప - ప్లాస్టిక్ వ్యర్థాలూ!

            50 పని గంటల పిదప చూస్తే - వంద శాతం స్వచ్ఛ – శుభ్ర - సుందరంగా కాదు గాని, ఆ ప్రదేశం నిన్నటికన్న భిన్నంగా కనిపించింది. ఇంకోమారు - ఇంకో 10-15 పని గంటలు శ్రమించి, క్రమపద్ధతిలో 40-50 చెట్లనూ, పూల మొక్కల్నీ నాటి పెంచితే 40 కి పైగా ఉన్న ఇళ్లవారికెంత ఆహ్లాదదాయకంగా ఉంటుందో గదా!

            ఇది కాక – రైతు బజారు వీధిలో 10 మంది చేసిన కృషి కూడ అక్కరకొచ్చింది. డ్రైను ప్రక్కనా, ట్రాన్స్ఫార్మర్ దగ్గరా ఏపుగా పెరిగిన గడ్డీ, పిచ్చి మొక్కలూ ఇప్పుడు మిగల్లేదు. చీపుళ్ల ఊడ్పుల్లో దుమ్మూ - ఇసుకా తొలగి రోడ్డు కాస్త బాగుపడింది.

            3 వేల రోజులకు దగ్గర పడుతున్న ఈ గ్రామ స్వచ్ఛ - సుందరోద్యమంలో ఏ నాటి శ్రమైనా థ్రిల్లింగ్ గానే ఉంటుంది గాని, క్రొత్తగానే అనిపిస్తుంది గాని, ఈ వేకువ గజగజ వణికిస్తున్న చలీ - మంచులో కొన్ని ప్రముఖ శ్రమ ఘట్టాల్ని ప్రస్తావిస్తాను అవేమనగా:

- ఎగుడు దిగుడు చోట్ల - కాలు సరిగా లేని ఒకరిద్దరూ, షష్ట్యబ్ద వయోధికులూ కత్తులూ, చిన్న పంజాలు వాడి, ప్లాస్టిక్ తుక్కులేరిన సంగతీ,

- 2 బళ్ల వ్యర్ధాల్ని చాకచక్యంగా ట్రక్కులోనే త్రొక్కి, సర్దిన లోడింగ్ నైపుణ్యమూ

- దిక్కుమాలిన చెత్త పనుల్లో కూడ సంతోషం వెదుక్కొనే కార్యకర్తల వైఖరీ.....

            6.30 కు సమీక్షా సమావేశంలో కార్యకర్తల మెప్పు పొందిన ఒక కానిస్టేబుల్ - రమేష్ గారి శ్రమదానోద్యమ నినాదాలూ,

            అంతిమంగా రేపటి వేకువ మన శ్రమ వేడుక వేదిక బందరు రోడ్డులోని చంటి హోటల్ వద్దననే నిర్ణయమూ,

            తరు రక్షణ – క్రమ శిక్షణ

విరిపందిరి శ్రమ బంధుర సుమసుందర చల్లపల్లి

తరు రక్షణ – క్రమ శిక్షణ పురిగొలిపే చల్లపల్లి

రహదారుల విరి తోటల తహతహగా చల్లపల్లి

సుమనోహర ప్రమదావని స్వచ్చోత్తమ చల్లపల్లి!

- ఒక ‘స్వచ్ఛ సుందర చల్లపల్లి’ కార్యకర్త

  21.12.2023