పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు మనకేల?

మళ్ళీ 216 వ రహదారికే 23 గ్గురి సేవలు - @3197^*

            అది 8.8.24 – శ్రావణ బహుళ చవితి – గురువారపు బ్రహ్మ కాలం; NH 216 కు చెందిన – శివరామపురం అడ్డ రోడ్డుకు దగ్గర్లోని ఒక బస్ షెల్డర్ ప్రాంతంలోని దక్షిణపు సుమారు 150 గజాల ప్రాంతం; తగదుమమ్మా అని 2-3 ఊళ్ళకు చెందిన ఇరవై ముగ్గురి సంసిద్ధం; వానలకు వెరవక – ఎండలకు జడవక – ఏ నాటి నుండో చల్లపల్లి గ్రామ స్వచ్చ – శుభ్ర – బాధ్యతలు మోస్తున్న మొండి ఘటాలవి!

            ఈ వేకువ జామున రహదారి వెంట 50 పూల మొక్కలు నాటడానికి వానదేవుడు సహకరిస్తాడనే అంచనాతో – ఏ 3 ½ AM కో లేచి, 4.15 కి కార్యకర్తలు ఆ దూర స్థలానికి చేరుకున్నారు. ఐదారు సార్లు పూల వర్షం కురిసి, వాళ్ళ తలలూ బట్టలూ తడిస్తే తడిశాయి గాని, పనులకు ఆటంకం కలగలేదు. పనిచోటు తడితడిగా మారింది గాని, ఏ ఒక్కరూ జారి పడలేదు.

            కాకపోతే – ఒక అరుదైన సంఘటన – అక్కడ రోడ్డు ప్రక్కన పడి, ఆకులు ఎండి, చుట్టూ గడ్డి పెరిగిన ఒక తాటి చెట్టు – మట్టలు నరుకుతున్న ముగ్గురులో ఒక ఆకుల దుర్గా ప్రసాదు గజమెత్తున ఎగిరి ప్రక్కకు దూకాడు – అది తాటి పామో, జెర్రి పామో  గాని అతని చేతి ప్రక్కగా జరజరా ప్రాకిందట! 2 నిముషాల తర్వాత వాళ్లు తమ పనికానిచ్చారు.

            ఒక వంక సన్న చినుకుల తుంపర – మైకు నుండి ఘంటశాల వారి పాటా  - మధ్యలో ఇద్దరు ముగ్గురి ఛలోక్తులూ – కుంటుబడకుండా ఉత్సాహంగా సాగిపోతున్న బాధ్యతామయ వ్యక్తుల సామాజిక కర్తవ్యాలూ – ఈ సన్నివేశాన్ని దగ్గరగా చూస్తే ఎంత మనోహరంగా ఉంటుంది? ఆ విధంగా –

- రహదారి మీద పేరుకుంటున్న తడిమన్నును గోకుడు పారల్తో చెక్కిన,

- మొక్కలు పెట్టే చోట కలుపూ తొలగించిన, పాదులు త్రవ్విన,

- 5:1 నిష్పత్తిలో సువర్ణ గన్నేరు, పారిజాత వంశాల మొక్కలు నాటిన,

- ఒక గోనె సంచీడు ప్లాస్టిక్ సామాన్లు ప్రోగేసిన పనులన్నీ విజయవంతంగా ముగిశాయి.

            ఇక అప్పుడు రాదారి ప్రయాణికులు ఉలిక్కిపడేలా వినిపించాయి – కోడూరు వేంకటేశ్వరుని స్వచ్చ – సుందరోద్యమ నినాదాలు!

            ఆ పిదప – అడపా వాని నిత్య వినూతన సూక్తులు!

            ఈ మహత్కార్యాలను చూసిన – పర్యవేక్షించిన – డాక్టరు దాసరి రామకృష్ణ ప్రసాదుని అభివందనలు!

            అందరి సూచనల సారాంశంగా – రేపటి వేకువ అందరం కలువదగిన చోటు ఇదే NH 216 లో – సబ్బినేని భవాని గారి ఆస్పత్రి తిన్నగా అనే నిర్ణయం!                      

         ఎవరు చెప్పగలరులే

ఎవరు చెప్పగలరులే – ఏదో ఒక రోజున

చల్లపల్లి జనమంతా కదలి ఒక్క పెట్టున

ఎవరి వీధి చిక్కుముడులు వారె విప్పి చూపిన

ఆశ్చర్యం ఏముండదు – అన్ని అనుకూలించిన!      

- ఒక తలపండిన కార్యకర్త

     08.08.2024