పర్యావరణ విధ్వంసకమవుతూ-కేవలం ఒక్కసారి వాడేసే ప్లాస్టిక్కులు అవసరమా?

మంగళవారవు (3.12.24) శ్రమదానం 3311^* వ సారి.

          అది 216 వ రహదారిలోని కాసానగరి నుండి కప్తానుపాలెం దిశగా జరిగింది. 4:20 నుండి 6:20 దాక – చినుకు చిత్తడి లేకున్నా చలిగాలుల మధ్య తాపీగానే జరిగిపోయింది.

          పారిశుద్ధ్య పనులు జరిపింది 27 మంది కాక - కాసానగర చిన్నారులు ముగ్గురు కూడ!

          క్రమపద్ధతిలో పనులు జలిగిన మాట వాస్తవమే గాని సులభంగా - సుకరంగా కాదు! బాటల కూడలి మూల మలుపు కావడం వల్ల, ఎత్తు పల్లాల చోటైన కారణంగా దుమ్మూ కసవూ ఊడ్చిన కష్టం కన్న - చిరుగుంటలు పూడ్చిన శ్రమకన్న - డివైడర్ల కలుపేరి, మట్టి నింపటం కన్న - వందలాది డిప్పల వ్యర్ధాల్ని ట్రాక్టర్లోకి మోయడం కన్న -వాహనాల్ని తప్పుకొంటూ పని ముగించడమే పెద్ద విశేషంగా చెప్పుకోవాలి!

          ఒక వైద్య కార్యకర్త తాను పని చేయడం కంటే - ఈ జాగ్రత్తలు తీసుకోవడానికే ప్రాధాన్యతనిచ్చారు. తెలవారే వేళ - జతలుజతలుగా, జట్లుజట్లుగా అందరు ఎంత దీక్షగా పనిలో మునిగారంటే - సదరు DRK వైద్యుడు ఆ శ్రమైక జీవన దృశ్య సౌందర్యావలోకనంలో మునిగి, 6:15 కు దాక విజిలు ఊదడమే మరిచి పోయేంత!

          అసలీ శ్రమ దృశ్య ప్రత్యేకతలూ, ఊరికి సుదూరంగా వీధి సౌందర్యారాధనలూ ఊరి ప్రజల్లో ఎందరికి పట్టాయిలెండి! ఎవరి పనుల హడావిడిలో వాళ్లు! ఎవరి జీవన తాపత్రయంలో వాళ్లు!

          స్వచ్ఛ కార్యకర్తలు మాత్రం 6:25 సమయంలో కాఫీ సేవిస్తూ తమ కష్టం వల్ల 150 గజాల రహదారి 2 గజాల వెడల్పు విస్తరించిన వైనాన్నీ పని జరిగిన - జరగని చోటుల వ్యత్యాసాన్నీ బేరీజు వేసుకొన్నారు!

          అప్పుడిక అడపా గురవయ్య మైకందుకొని, స్వచ్చ సుందరోద్యమ నినాదాలతో బాటు 2 సూక్తుల్ని వినిపించాడు.

          రేపటి శ్రమ త్యాగం కూడ కప్తానుపాలెం – కాసానగరుల మధ్యనే జరుగునని ఇందుమూలముగా తెలియుచున్నది.

          ఎక్కడెక్కడ గూటి పక్షులు

కనెక్టికట్ లో ఒక సురేశుడు భాగ్యనగరిలొ వర ప్రసాదుడు

నిన్న వేకువ సినీదర్శకుడున్న పళముగ వచ్చి కలియుట!

ఎక్కడెక్కడ గూటి పక్షులు ఒక్కచోటికి చేరుచుండుట!

ఈ శ్రమోద్యమ మెంతమందికి ఇన్స్పిరేషన్ ఇచ్చుచున్నదొ!

- నల్లూరి రామారావు

   ఒక సీనియర్ స్వచ్ఛ కార్యకర్త

   03.12.2024