పర్యావరణ ధ్వంసకమవుతూ - కేవలం ఒక్కసారి వాడేసే ప్లాస్టిక్కులు ఇంకెంత కాలం?

“ఆహా!” అనిపించిన సామాజిక – సామూహిక శ్రమదానం @3660^*

               చల్లపల్లి స్పచ్ఛ సుందరోద్యమంలో శలవు దినాలనేవి జాన్తానై! పైగా – అందరికీ ఆటవిడుపులైన శని – ఆదివారాల్లో సదరు గ్రామ సేవలు మరీ ఉధృతమౌతుంటాయి కూడ! సొంతానికి ఆశించిక చేసే పనులిలాగే ఉంటాయి మరి!

               ఉదాహరణకు ఈ శనివారం (22-11-25) వేకువ శ్రమానందాన్ని గమనించండి -

4.30 కు కాదు - 4.17 కే షోడశ కార్యకర్తలు RTC ప్రాంగణంలో హాజరు! 3 చోట్ల స్పచ్ఛ కార్యక్రమం -

1) RTC ఆవరణం,

2) పద్మావతి ఆస్పత్రి పరిసరం

3) P.K.. పల్లి రోడ్డులోని మేకలడొంక.

               జరిగిన పనులంటారా? ఏ రోజైనా వాటికేం లోటు గనుక ? ముందుగా రెస్క్యూటీం సంగతే చూద్దాం - కాస్త వయసు మీరిన ముగ్గురితో సహా వాళ్లు పంచ పాండవులు! తొలుత బస్టాండులోని, తరువాత ఆస్పత్రి దగ్గరి మొన్నటి తుఫానుకు విరిగి కూలిన భారీ వృక్ష కాండాల్ని వాళ్లెలా ట్రాక్టరులోకి ఎక్కించారో - కోత మిల్లు దగ్గరకు చేర్చి, దించారో అదంతా స్వయంగా చూసి తీరవలసిన దృశ్యాలే!

               మరి - బస్ ప్రాంగణంలోని 3 విధాల – 3 చోట్ల పనులు మాత్రం తక్కువా? మొదటిది - ఆస్పతి మహిళా సిబ్బంది 5 గురు స్కూటర్ల – సైకిళ్ల స్టాండును క్షుణ్ణంగా శుభ్ర - సుందరీకరించే అవకాశాన్ని సద్వినియోగపరచుకొన్నారు - వాళ్ల బట్టలు దుమ్మే కొట్టుకొన్నాయో - ఒంటి నిండా చెమటలే కారాయో - అది వేరే సంగతి!

               రెండవది - ఒకప్పుడు తాతినేని రమణ నిర్వహించిన నర్సరీ ప్రాంతంలో 15

మంది పట్టి పట్టి శుభ్రపరచిన ప్రస్తావనార్హ శ్రమ! అందులో సగం మంది వంచిన నడుములెత్తనే లేదు! గంటల తరబడీ పని చేసిన ఈ ముఠా అద్దంలా ఉన్న ఆ 2 సెంట్లలో నిలబడి ఫొటో దిగడమంటే – తమ సంతృప్తిని రోజంతా నిలుపుకోవడమన్నమాట!

               మూడవ పని - మరొకమారు పెద్ద గార్డెన్ ను మరింత శుభ్రంగా - పొందికగా మార్చడమే! ఆ 20 మందీ మరీ ముఖ్యంగా 5.55 - 6.29 నడుమ ప్రదర్శించిన అభినివేశమూ, తత్ఫలితంగా తుఫాను ముందటి రూపు సంతరించుకోవడమూ – నేను కాక - మంచి కవి ఎవరైనా చూస్తే ఒక మంచి కావ్యమే వ్రాసి ఉండేవాడు!

               అక్కడికీ విజిల్ ఊదే ఆయన 3 మార్లు బాగా మ్రోగించి, కొందర్ని బ్రతిమాలి, సాధ్యపడక - చేతులెత్తేస్తే - అరగంట ఆలస్యంగా 6.30 కు పని పూర్తిచేసి గాని వాళ్ళు గార్డెన్ బైటకు రాలేదు!

               మరొక విశేషం - వెలివోలుకు చెందిన మహిళ ఎక్కడికో వెళ్తూ బస్ దిగి, వీళ్ల శ్రమదానంతో తక్షణ ప్రేరణ పొంది, 20 నిముషాలు పని చేయడం!

46 మంది పాల్గొన్న సమీక్షా సభలో :

1) నేటి పని పట్ల DRK గారి ఆశ్చర్యార్ధకాలూ,

2) అడపా గురవయ్య సూక్తులూ, వారి స్వగ్రామంలో 12:00 కు భోజనాలకాహ్వనమూ

3) రేపటి మన వీధి బాధ్యతలు విజయా కాన్వెంటు ప్రక్క వీధిలో అనే సమాచారమూ!

               దేన్ని మరచిపోగలను?

“అన్నా! వదినా! బాబాయ్!” అని సంబోధించటమా?

కులమతాల రొస్టు వీడి కలసిమెలసి శ్రమదానమా?

ఒకే మాట - ఒకే బాట - ఒకే సేవ పద్ధతులా?

ఏ విషయం మెచ్చవలెను? దేన్ని మరచిపోగలను?

- నల్లూరి రామారావు

    ఒక సీనియర్ స్వచ్ఛ కార్యకర్త

    22.11.2025