పర్యావరణ ధ్వంసకమవుతూ - కేవలం ఒక్కసారి వాడేసే ప్లాస్టిక్కులు ఇంకెంత కాలం?
29.11.25(శనివారం) నాటి శ్రమదాన సంగతులు - @3667*
శ్రమదాతలు రోబోలు కాక మనసున్న మంచి కార్యకర్తలు కనుక ఏ పూట ఎప్పుడే పారిశుద్ధ్య కృషి చేస్తే ఊరికి మంచిదో తెలిసిన వాళ్ళు గనుక – ఏరోజుకారోజు ఈ పారిశుద్ధ్య పరిశ్రమలు క్రొత్తగానే – చైతన్యవంతంగానే జరిగి ఉత్సాహంగానే ముగుస్తుంటాయి
లోతుగా విశ్లేషించక, ఏదో పైపైన చూసేవాళ్లకు మాత్రం “ఆ ఏముందిలే బోరు - ఆ10-12 మంది మహిళల చీపుళ్ల ఊడ్పులూ, పారల్తో గోకుడు, పారల్తో రోడ్డు మీద దుమ్ము చెక్కుడూ, ప్రోగులు చేసిన తుక్కుల్ని ట్రాక్టర్లోకి ఎత్తుడూ, చివర్లో కాఫీలు త్రాగుడూ, జోకులేసుకొని నినాదాలు చెప్పుడూ....” అనిపించవచ్చు.
కాని పాటల శ్రీనుకూ, నాలాంటి కొందరికీ అలా కాదు – “ఈ చల్లపల్లి శ్రమదానోద్యమం ఎప్పటికైనా గ్రామీణ భారత ముఖచిత్రాన్ని మార్చగలదు, స్తబ్దత వదిలించగలదు, గాంధీజీ కలలుకన్న స్వచ్ఛ-శుభ్ర-సుందర భారతావనిని ఆవిష్కరించగలదు!”
అందుకు ఋజువులు కావాలా? ఇవిగో:
- ఇది చల్లపల్లిలో పన్నెండేళ్ల సార్థకమైన విజయవంతమైన శ్రమోద్యమం.
- ఈ వేకువ 12 మంది మహిళలతో సహా 45 మంది కార్యకర్తలు ఏ 3.30 కో మేల్కొని, చలిని ధిక్కరించి, తమ నివాసాలకు 3 కి.మీ. దూరంలోని పడమటి వీధికొచ్చి, 2 గంటలు నానా మురికి పనులు చేశారా లేదా?
- ఇదే స్వచ్ఛ చల్లపల్లి ఒక దశాబ్దకాలంలో 2 రాష్ట్రాల్లో 40 గ్రామాల్లో శ్రమ సందేశాన్ని చాటి చెప్పిందా లేదా?
- ఇదే జిల్లాలో భట్లపెనుమర్రు గ్రామంలో స్వచ్ఛ సుందరోద్యమం ప్రారంభించాలనే పట్టుదలతో 3 మెడికల్ కాలేజీల ప్రిన్సిపల్ 86 ఏళ్ల డాక్టర్ తలశిల ప్రసాదరావు అనే వ్యక్తి ఈ వేకువనే వచ్చి, పరిశీలించి వెళ్లారు కదా!
6.30 సమయంలో ‘దేసు మాధురి’ శబ్దించిన త్రివిధనినాదాల పిదప, నేటి 150 గజాల పడమటి వీధి పారిశుద్ధ్యాన్ని ఉభయ వైద్యులూ పరిశీలించి, ప్రశంసించి, గురవయ్య గారి సూక్తులు ఆలకించి,
రేపటి వేకువ ఇదే పడమటి బజారులో కలియాలనే నిర్ణయంతో నిష్క్రమించారు!
గొప్ప గ్రామం – స్వర్గ ధామం – 2
కలిసి కదిలితె జనసమూహం, తొలగితే చెత్తా - చెదారం
కనువిందు చేస్తే పచ్చదనములు, శుభ్రపడితే జనుల మనసులు
ఐకమత్యం కుదురుకొంటే, సదవగాహన పెరుగుతుంటే....
అదే మరి ఒక గొప్ప గ్రామం - కాగలదు అది స్వర్గధామం!
- నల్లూరి రామారావు
ఒక సీనియర్ స్వచ్ఛ కార్యకర్త
29.11.2025
