భళిర స్వచ్చ సైనికా! చల్లపల్లి సేవకా!
మాతృభూమి ఉన్నతికై – మహోదాత్త పుత్త్రకా!
11 భళిర స్వచ్చ సైనికా 11
కాలుష్యం ఊరి పైన కాలు దువ్వుతున్నప్పుడు
గ్రామంలో శుభ్రత అడుగంటి – జబ్బులెన్నొ ముసిరి
నీ సోదర గ్రామస్తులు నీరసించి పోవునపుడు
ఎవరెవరోరావాలని – మనలనుద్ధరించాలని
ఎదురు చూడలేదు నీవు – నీ శ్రమనే నమ్మినావు - నీ శ్రమనే నమ్మినావు
11 భళిర! స్వచ్చ సైనికా – చల్లపల్లి సేవకా!
మాతృ భూమి మెరుగుదలకు మహోదాత్త పుత్త్రకా11
ఇంత పెద్ద గ్రామంలో – ఇన్ని రొచ్చు గుంటలలో
వందలాది వీధులలో – అంతులేని చెత్తలతో
రోడ్ల మురుగు గుంటలతో – మలమూత్ర విసర్జనతో
అస్తవ్యస్తమైన గ్రామ మంతటినీ చక్కదిద్ది
లోక మెల్ల మెచ్చదగిన కృషి కొనసాగిస్తుంటివి
11 భళిర! స్వచ్చ సైనికా – చల్లపల్లి పుత్త్రకా!
మాతృగ్రామ మేలిమికై - మహోదాత్త సేవకా 11
జీతభత్యములు నీవసలేనాడూ ఆశించవు
నీ నిస్వార్ధ కృషిలో ఎవరి మెప్పు కోరబోవు
“అసలు నాది సేవ కాదు – బాధ్యత” అని ప్రకటిస్తవు
ఊరుమ్మడి ఆరోగ్యం ఆనందం సాధిస్తవు
ఇదెగద నిష్కామ కర్మ – ఇదెనీ ఆత్మానందం
11 భళా! స్వచ్చ సైనికా – మాతృగ్రామ సేవకా!
చల్లపల్లి మెరుగుదలకు మహోదాత్త పుత్త్రకా11
శ్మశానాలు – బస్టాండులు – రహదారులు – ఆఫీసులు
కర్మకాండ భవనములు – ఖాళీ మట్టి దిబ్బలు
ఒకటొకటిగ తీర్చిదిద్ది – పుష్ప – హరిత మయం చేసి
పందొమ్మిది వందల డెబ్బది రోజులు పైగా నీ
ఊరి కొరకు పాటు బడి ఉన్నతికై తపించావు
11 భళిర స్వచ్చ సైనికా – చల్లపల్లి సేవకా!
ఉన్నఊరు శుభ్రతకై - మహోదాత్త పుత్త్రకా11
ఆదివారములు వస్తే – ఆనందంతో బాటుగ (ఆలాపనా)
పిన్నలు – పెద్దల మదిలో – విద్యార్ధులుపాధ్యాయులు
గృహిణులందు స్వచ్చ స్పృహ రగిలించగ పాటు బడుచు
స్వచ్చోద్యమ భావనలిక శాశ్వతమై నిలుచునట్లు
ఆహరహమూ శ్రమించావు – అద్భుతముగ నటించావు - అద్భుతముగ జయించావు
11 భళా! స్వచ్చ సైనికా – మాతృ గ్రామ రక్షకా
చల్లపల్లి సేవలలో – సాహసించు పుత్త్రకా11
నీ సహనం – నీ దీక్ష – పట్టుదల – ప్రగతి బాట
సృజన శీల గ్రామసేవ చరితార్ధములై నేటికి
పాతిక గ్రామాలలోనస్వచ్చ కేతనం ఎగిరెను
గ్రామాలకు సమయ – శ్రమ దానాలై వెలుగొందెను
మాన్యుడవై – ధన్యుడవై – మహనీయుడవై పోతివి
11 భళా! స్వచ్చ సైనికా – స్వస్తత పరిరక్షకా!
మాతృభూమి మెరుగుదలకు – మహోదాత్త పుత్త్రకా! 11
నీ కృషితో ఈగ – దోమ నీరసించి పోతున్నవి –
కాలుష్యపు అనకొండలు – కరిగి పారిపోతున్నవి –
పచ్చదనం నిండి ఊరు పరవశించి పోతున్నది –
పర్యావరణం తృప్తిగ – బ్రతికి బట్ట కడుతున్నది
మాన్యుడివై – ధన్యుడివై – మహనీయుడివై బ్రతికిన
11 భళా! స్వచ్చ సైనికా – చల్లపల్లి రక్షకా
ఉన్నఊరు స్వస్తతకై – మహోదాత్త పుత్త్రకా! 11
ఒక్కసారి వాడేసే ప్లాస్టిక్కులు వదిలేస్తివి
ఫ్లెక్సీలను మాన్పి హరిత వేడుకలను జరిపిస్తివి
సంతలలో ప్లాస్టిక్కులు చాల వరకు తగ్గిస్తివి
ముందు తరాలకు గొప్ప ప్రబోధాత్మక కృషి చేసిన
ఓ మాన్యుడ! ఓ ధన్యుడ! మహనీయుడ! ఆదర్శుడ!
11 భళిరా! స్వచ్చ సైనికా – చల్లపల్లి సేవకా
సొంతఊరు రక్షణలో– మహోదాత్త పుత్త్రకా! 11
నల్లూరి రామారావు, చల్లపల్లి
ఏప్రియల్ – 2020.