చల్లపల్లిలో క్రమంగా వ్యాపిస్తున్న “హరిత వేడుకలు”!

స్వచ్ఛ - సుందర - చల్లపల్లి కోసం జరుగుతున్న శ్రమదానం వయస్సు నేటికి 2390^* రోజులు! ప్రధాన వీధుల్ని, డ్రైనుల్ని, జనసమ్మర్దం ఉండే ప్రతి చోటును శుభ్రపరుస్తూ - గోడల్ని సుందరీకరిస్తూ రహదార్ల ప్రక్కన పచ్చదనాల పందిళ్ళు వేస్తూ – వేలకొద్దీ పూల మొక్కలు పెంచుతూ.... స్వచ్ఛ కార్యకర్తల 3 లక్షల పనిగంటల శ్రమతో ఆ గ్రామం ఇప్పటికే ఇరుగుపొరుగు రాష్ట్రాల్లో కూడ ఉదాహరణ యోగ్యంగా మారింది.

కార్యకర్తలతో బాటు ఊరి జనుల్లో సైతం ఇటీవల పర్యావరణ స్పృహ గణనీయంగా పెంపొందుతున్నది! మిగిలిన అన్ని కశ్మలాలకన్నా విందు - వేడుకల్లో ఒక్కమారు వాడి పారేసే ప్లాస్టిక్ వస్తువులే పర్యావరణానికీ, తద్ద్వారా మానవాళి భవిష్యత్తుకూ పరమ శత్రువులు!

పెడసనగంటి వేంకన్నబాబు - నాగలక్ష్మి (పద్మావతి ఆసుపత్రి ఉద్యోగిని) దంపతుల కుమార్తె నవ్యసాయి! వివాహవేడుక చండ్ర  వికాస కేంద్రంలో – నిన్న! (24.03.2022) అక్కడ జరిగిన విందు, వేడుక ప్లాస్టిక్ రహితం! ఒక్క ఫ్లెక్సీ లేదు, అసలు ఏ బ్యానర్ పెట్టలేదు, ప్లాస్టిక్ విస్తర్లు గాని, గ్లాసులు గాని, భోజనం బల్లల మీద ప్లాస్టిక్ పేపర్లు గాని, కప్పులు, స్పూన్లు గాని లేని ఒక నిరాడంబర – ఆదర్శ – పర్యావరణ హిత – హరిత వేడుక!

ఒక్కనాటి తమ సంతోషం కోసం వందల ఏళ్లు భూమిలో కరగని హానికర ప్లాస్టిక్ లు లేకుండ వేడుక నిర్వహించిన వధూవరులకు, నిర్వాహకులు స్వచ్ఛ - సుందర చల్లపల్లి కార్యకర్తల అభినందనలు!

- నల్లూరి రామారావు,

   స్వచ్ఛ సుందర చల్లపల్లి కార్యకర్త,

   ‘మనకోసం మనం’ ట్రస్టు బాధ్యుడు

   25.03.2022.