2000 దినాల స్వచ్చోద్యమ చల్లపల్లి సేవా తరంగాలు –

కార్యకర్తల స్వానుభవ జ్ఞాపకాల పరంపర – 14

చాల గ్రామాలు అర్ధం చేసుకొని – అనుసరిస్తున్న

మా 2000 రోజుల స్వచ్చ సుందర చల్లపల్లి ఉద్యమం.

నేను కోడూరు వేంకటేశ్వరరావు నండి. వేకువ జామున 2 గంటల స్వచ్చంద సేవా సమయంలో మా కార్యకర్తలు ‘చెక్క్ పోస్ట్ బాబాయ్” అనే పిలుస్తుంటారు. విజయవాడ రోడ్డు ప్రక్కన కోమలానగర్ లో ఉంటాను. ఈ స్వచ్చ కార్యకర్తలు వందో – రెండొందల రోజులో గాని, రోడ్డు మీద పెద్ద పెద్ద వాళ్ళతో మీటింగు పెడితే వెళ్ళి చూశాను గాని, పుట్టిన రోజు – పెళ్లి రోజు లాగ ఇంత పెద్ద ఉత్సాహమేంటా అని ఆలోచించాను. కూచిపూడి లో నా చెక్ పోస్టు ఉద్యోగ సమయంలో – అక్కడ గూడ ఇట్లాంటి మీటింగు పెట్టి – అక్కడ మాట్లాడేది మా చల్లపల్లిలోని పెద్ద డాక్టరంట – అనివిని వెళ్ళి DRK గారు చెప్పిందంతా విన్నా, ఆలోచించి, వీలైనప్పుడల్లా వేకువనే శ్రమదానంలోకి వచ్చాను.

            అందరూ ఒక్కసారి రిటైరైతే – నేను రెండు సార్లు రిటైరై – ఇప్పుడు నా వయసు 65 ఏళ్ళు – ఇక పూర్తిగా అన్ని రోజులూ వస్తున్నాను. అసలు ఇదేం ఉద్యమం సార్? “ఎవరింట్లోనో పెళ్లి పనుల్లాగ – రోడ్ల మీద అశుద్ధాలు, చెత్తలు, మురుగ్గుంటల్లో పూడికలు, శ్మశానాల్లో – బస్టాండుల్లో ఇంతమంది ఇన్ని వేల రోజులుగా – ప్రతిఫలమాశించకుండ ఎందుకు చేస్తున్నార్రా” అని మొదట్లో అనుకొనేవాడిని. ఒక విషయం గట్టిగా చెప్పగలనండి. ఈ ప్రపంచంలో ఏ దేశంలోలేని కులం జాడ్యం మన సొసైటీలో ఉందా, దీనెమ్మ – కులం ఎవడికైనా కూడు పెట్టిద్దా? చల్లపల్లి ని ఇట్లా బాగు చేస్తుందా? మా స్వచ్చ శ్రమదానం అంటే ఏఒక్కరిలోను, ఈ దరిద్రపు కులం – మతం – రాజకీయం – ప్రాంతం తేడాలేవీ కనిపించని ఎడారిలో ఒయాసిస్సండి బాబు!

        మా డాక్టర్లిద్దరికి చేతులెత్తి దండం పెట్టాల్సిందే! వాళ్ళ ఎంత డబ్బు, సమయం, శక్తియుక్తులు, ఐదారేళ్ళ తమ జీవితాలను ఈ ఊరి కంకితం చేశారు గదా! ఊళ్ళో కొందరు అమాయకులు ఈ డాక్టర్లకు కోట్లు కోట్లు డబ్బొచ్చిపడుతుందనీ, కార్యకర్తలందరికీ లోపాయకారీగా నెల నెలా ముట్ట చెబుతారనీ, లేకపోతే ఈ 40 – 50 మంది చీకట్లో ఊరి కోసం ఇంత చెత్త – మురికి పనులు చేస్తారా అని మొదట్లో చెప్పుకొనేవాళ్లండి. నిజం నిలకడ మీద తెలవక తప్పదుగదండి.

            నా వరకు నేను యధార్ధం చెపుతున్నాను – మా డాక్టర్ల అండ – సోదర కార్యకర్తల సహచర్యం – శ్రమదాన సందడి  - ఈ మాత్రం నాకు నచ్చిన శారీరక శ్రమ లేకపోతే - 12 ఏళ్ల క్రిందట గుండె చికిత్స చేయించుకున్న నేను బహుశా నాలుగేళ్ల క్రిందటే చచ్చేవాణ్ణి! నా ఒంటికీ, మనసుకు ఆరోగ్యాన్నిస్తున్న ఇంత మంచి స్వచ్చ కార్యక్రమానికి నేనెలా దూరమౌతాను?

- కోడూరు (చెక్ పోస్టు) వేంకటేశ్వరరావు,

స్వచ్చ సుందర చల్లపల్లి కార్యకర్త

15.05.2020