పర్యావరణ ధ్వంసకమయ్యే - కేవలం ఒక్కసారికి మాత్రమే పనికి వచ్చే ప్లాస్టిక్కులు వెంటనే మానేద్దాం!

అదే రహదారి - ఆ పనులే – అంతమందే శ్రమదాతలు - @3064^*

          19.3.24 (మంగళవారం) వేకువన తారీఖైతే మారింది గాని, కార్యకర్తల సంఖ్య మారలేదు - 21 మందే; మళ్ళీ శివరాంపురం దగ్గరి గుంటల రోడ్డే; 4:22 – 6:15 సమయమే, మట్టి గుట్టల్ని త్రవ్వి - ట్రక్కులో నింపుకొని – ఎక్కడ పూల, పండ్ల మొక్కల పాదుల్లో అవసరముందో కనిపెట్టి, మొక్కలకు ముళ్ల కంచె చెడకుండా పాదుల్లో పోసి, సర్దే పనులే!

          “జై స్వచ్ఛ చల్లపల్లి సైన్యం” వాట్సప్ సందేశం క్రమం తప్పక చదువుతున్న వాళ్లకి ‘ఒకే రోడ్డు మీద - ఒకే పని వేళ - ఇంచుమించు ఒకే కార్యకర్తలు విసుగూ విరామం లేక చేస్తున్న శ్రమదాన వార్తలు చదివీ - చదివీ బోరనిపిస్తున్నదేమో గాని –

          తమది కాని రహదారిని స్వచ్ఛ - పరిశుభ్ర - సుందరంగా మార్చి, నిర్వహించేందుకు ఒక ‘కోనేరు ట్రస్టు’ వారెంత వ్యయిస్తున్నారో, కిలోమీటరు నిడివి గల రోడ్డు కిరు ప్రక్కలా పండ్ల – పూల మొక్కలు నాటి, పాదులు చేసి, సారవంతమైన మట్టిని నింపేందుకు స్వచ్ఛ చల్లపల్లి సైనికులూ, వారి అడుగు జాడల్లో, వెంకటాపురం పాఠశాల పిల్లలూ ఎలా శ్రమిస్తున్నారో తెలుసుకోవడం అవసరమే!

          ఈ అన్ని వయసుల – అన్ని హోదాల కార్యకర్తలు నిద్ర పట్టక మంచాలు దిగి వేకువనే 3-4 కిలోమీటర్లు వచ్చి మరీ శ్రమించండం లేదు –

తమ సామాజిక బాధ్యతగా మాత్రమే వాళ్ళ శ్రమ!

నేనీ పూట మెచ్చిన శ్రమ దృశ్యములేవంటే :

- ఏడో, ఎనిమిదో తరగతి విద్యార్థినులిద్దరు టాటా ఏస్ లో మట్టి పెళ్లలు సర్ది, చెంగున క్రిందకు దూకడం;

- పట్టుమని పద్నాలుగేళ్ళు లేని స్కూలు పిల్లలు పారల్తో మట్టి లాగి, డిప్పలకెత్తి, అవసరమైన మొక్కల వద్దకు మోయడం;

- ఒక గంధం లక్ష్మణ చాలీచాలని వెలుతుర్లోనే ముళ్ల కంచె లోపల ఒడుపుగా మట్టిని పేర్చడం;

          ఇవే కాక మరో రెండు ఆకర్షణీయ దృశ్యాలను మన వాట్సప్ మాధ్యమంలో మీరైనా చూడవచ్చు –

          - నేటి పని వేళ ముగిశాక రెండు వైపులా మొక్కల్తో శుభ్రమైన శివరాంపుర - వెంకటాపురం బాట ఎంత చక్కగా కనిపిస్తున్నదో!

          ఈ పూట ఉభయ గ్రామాల స్వచ్ఛ – సుందరోద్యమ నినాదకర్త నందేటి శ్రీనివాసుల వారే!

          చల్లపల్లి స్వచ్ఛ సుందరోద్యమ ప్రాతకాపు గౌ.రావూరి సూర్యప్రకాశరావు గారు ఈ ఉదయం ఉద్యమ ఖర్చులకు గాను 25,000/- డ్రాఫ్ట్ రూపంలో ఇచ్చినందుకు కార్యకర్తలందరి ధన్యవాదములు.

          రేపటి వేకువ సైతం మనం కలిసేది శివరామపురం దగ్గరి రహదారి మీదనే!

     అంకితులు మన చల్లపల్లికి – 25

స్వచ్చోద్యమ తొలి దశలో సాహసించి ముందుకొచ్చి

వీధి కాపలాలు కాసి, వెలిగిన కప్పుర హారతి

చురుకుదనం - కరకుదనం చూపించిన భారతి

ఆర్థిక ముగ - హార్దికముగ అండనిచ్చు ధీమతి!

- ఒక సీనియర్ స్వచ్ఛ కార్యకర్త

  19.03.2024