పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు ఇంకెంత కాలం?

భవఘ్ని నగర్ వీధి సేవల పొడిగింపు - @3222^*

         సోమ, మంగళ(3.9.24) వారాల్లో కార్యకర్తల కర్మక్షేత్రమొక్కటే - భవఘ్ని (= మరో జన్మ లేకుండా చేసే అంటే మోక్ష మిచ్చే) నగర్ - దాటిన వీధి మలుపు దగ్గరే! ఈ రెండు రోజుల్లోనూ శ్రమ సమర్పకుల సంఖ్యా ఒక్కటే - 27 మంది! మరొక 111 రోజుల్లో నేటి 3222 సంఖ్య కాస్తా ఒక మాంత్రిక సంఖ్య – 3333^* గా మారుతుంది!

         ఐతే-బుడమేరూ, మానేరూ ఉపనదుల ఉప ద్రవ వరదల్లా కాదు-నీరవ ప్రశాంత గోదావరి కదలికలా చల్లపల్లి స్వచ్చంద శ్రమ స్రవంతి కనీసం మరో దశాబ్దకాలం ప్రవహిస్తూనే ఉంటుంది!

         మరి-‘నేటి 27 మంది శ్రామికులు వేకువ 4:12-6.06 సమయాల నడుమ ఈ గంగులవారిపాలెం వీధి భాగానికేం ఒరగబెట్టారు?’ అని ప్రశ్నిస్తే:

- సంఘజీవులుగా గ్రామం చివరి వార్డులో తమ కర్తవ్యం నెరవేర్చారు.

- పోసుకోలు కబుర్లాడు కోవడం కాదు – సన్న చినుకుల మధ్య కనీసం ఒక్క వీధి భాగాన్ని బాగు చేసేందుకు శ్రమించారు.

- వీళ్లని పంచాయతీ పురమాయించలేదు, అధికారులు బ్రతిమాల్లేదు, కేంద్ర రాష్ట్ర ప్రభుత్వాలు అభ్యర్థించనూలేదు, కేవలం స్వయం ప్రేరణతో తమకు తోచిన మంచిని తమ ఊరికి చేశారు.

- అందుకోసం మట్టి త్రవ్వారు, బురద పిసికారు, రోడ్డు మార్లిన్ బలహీనపడిన చోట కోసుకుపోకుండా పెగ్గులు పాతి – కొమ్మలడ్డువేసి, మట్టి కప్పి చదును చేశారు.

- ఇది వైయక్తిక లబ్దికి కాదు, ఒంటరిగా ఎవరికి వాళ్ల ప్రయత్నించేది కాదు, ఒకే విధమైన సానుకూల దృక్పధమున్న కొందరి సమష్టి ప్రయత్నం.

- చిన్న మొక్కల్ని కాపాడి, అక్కర్లేదనుకొన్న మహా వృక్ష ఖండనం చేశారు.

- ‘అయ్యో! ఇన్ని వేలరోజులైనా తక్కిన గ్రామస్తులు వచ్చి మాకు సహకరించరే’ అని విచారించక ఒక నిష్కామకర్మ నిర్వహిస్తున్నారు.

         ఇందరి పని ఫలితంగా మెరుగుపడ్డ వీధి మరొక 100 గజాలు.

         తమ ఆనవాయితీ ప్రకారం ఈపూట స్వచ్చ – సుందరోద్యమ నినాదాలు ఉచ్ఛరించినది మెండు శ్రీను.

         “బండ్రేవు కోడు కాల్వ ఉత్తరపు వీధి పనులు రేపటివి” అని సూచించినది దాసరి రామకృష్ణ ప్రసాదు.

         నెలవారీ చందా దాత బత్తిని శ్రీనివాసులు – ఉమాదేవి గార్లు ఈ నెల కూడా వారి 5,000/- విరాళాన్ని ట్రస్ట్ అకౌంట్ కు బదిలీ చేసినందుకు ధన్యవాదాలు.

         పద్మావతి ఆసుపత్రిలో నర్సు నలుకుర్తి కృష్ణకుమారి వారి భర్త స్టీఫెన్ బాబు స్వచ్చ చల్లపల్లి అభివృద్ది కోసం డా.డి.ఆర్.కె.ప్రసాదు గారికి 5,000/- విరాళాన్ని సమర్పించడం అభినందనీయం.

         మార్గాంతర మేమున్నది

ప్రభుత్వాల నిధులు నాస్తి - బకాయీల బెడద జాస్తి!

ఎవరికి వారే మేల్కొని ఎంతొకంత శ్రమ చేయక -

స్వచ్చోద్యమ కారులతో చేయి కలిపి నడవక –

మార్గాంతర మేమున్నది మన గ్రామం సంస్కరణకు?

- ఒక తలపండిన కార్యకర్త

   03.09.2024