పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు అవసరమా?

4.10-6.10AM. కాలపు శ్రమ సంరంభం! @3276^*

          36 మంది సామాజిక ప్రయోజక కార్యకర్తలు ఒక చోట చేరినప్పుడు - వారిలో శస్త్రచికిత్సా నిపుణులూ, మహిళలూ, వివిధ వయసుల – కుటుంబ నేపధ్యాల చిన్నా-పెద్దా మనుషులున్నప్పుడు - కవి గాయక కళాకారులు పూనుకొన్నప్పుడు – వాళ్ళకు తోడుగా ధ్వని అదుపాజ్ఞల్లో ఉన్న మైకు పాటలు తోడైతే.... సందడికేం లోటు?

          ఈ 30 కి పైగా తలలలో ఊరి మంచి కార్యక్రమాల ప్రణాళికలూ, చేతుల్లో రకరకాల పనులకనువైన పనిముట్లూ, కళ్ళలో వీధి కాలుష్యం పట్ల కసీ, మురుగు కాల్వ సరిగా పారుతున్నదా - లేదా అనే ఆరా, రోడ్డు మార్జిన్లలో ఏ పిచ్చి మొక్కో, క్రొత్తగా కట్టే భవనం ఎదుట వ్యర్ధాలూ, మాంస దుకాణాల దగ్గరి గలీజులో ఉంటే గట్టి స్పందనా!

          తూర్పు కోదండ రామమందిరం ఎదుట ఆగింది మొదలు కొందరు నిన్నటి రిలయన్స్ ప్రాంతంలో మళ్లీ శుభ్రపరుస్తుండగా –

          ఒక మాజీ వార్డు సభ్యురాలు రోడ్డు మీద పరచుకొన్న ఇసుకా, రాతి గులకా క్రొత్త నిర్మాణం వైపుకు నెట్టుతుండగా – బాటకు దక్షిణపు డ్రైన్ ఒడ్డున గడ్డి పీకే వాళ్లు పీకుతుండగా చీపుళ్ల వారు మసీదూ, మేదర కుటీర పరిశ్రమల, సిమెంటు దుకాణాల దగ్గరి సకల జాతుల వ్యర్ధాల్నీ ఊడుస్తుండగా –

          సుందరీకర్తలు తమ పనుల్లో తాము “మునగానాం – తేలానాం” అన్నట్లు పాటుబడుతుండగా –

          భళ్లున తెల్లారనే తెల్లారింది! అప్పటికి బందరు వీధి కమ్యూనిస్టు బజారు దాక ఎంత బాగుపడిందో స్వయంగా చూడని  గ్రామస్తులు వాట్సప్ ఫోటోలైనా చూడవచ్చు!

“అలజడి మా జీవితం - ఆందోళన మా ఊపిరి -

తిరుగుబాటు మా వేదాంతం......” అనే శ్రీశ్రీ గేయం లాగా

“గ్రామ వీధి పరిశుభ్రత వీళ్ళ లక్ష్యం - హరిత పుష్ప సౌందర్యాలు వీళ్ల ఆశయం; ఏ నాటికైనా తమ ఊరిని దేశపటంలో నంబరు వన్ గా తీర్చిదిద్దాలన్నది వాళ్ళు కట్టుకొన్న కంకణం!”

          ఆరున్నరకు చెరువు గట్టున జరిగిన సమీక్షా, ప్రణాళికా సమావేశం కూడా సందడిగానే – ఉత్సాహంగానే! కార్యకర్తలందర్నీ 9.11.2024 నాటి పదేళ్ళ ఫంక్షన్ మూడ్ పట్టుకొన్నది! కస్తూరి ప్రసాద్ సందర్భోచిత నినాదాలు చేశాక – కొందరు ఇళ్లకు పోకుండా – శ్మశానానికీ, 216 వ రహదారికీ వెళ్లారు!

          రాజ్యలక్ష్మి ఆసుపత్రి వీధి దగ్గరి చంటి హోటల్ వద్ద రేపు 4.30 కు కలవాలని నిర్ణయించుకున్నారు. 

          ఘన నివాళులర్పిస్తాం!

ఎవరి చెమట చలువ వలన ఈ బందరు వీధి నేడు (29.10.24)

100 గజాలకు పైగా బాగుపడెనొ – మెరుగయ్యెనొ –

గడ్డి చెక్కి – కసవులూడ్చి – కష్టించిన స్వచ్ఛ - మాన్య

కార్యకర్తలందరికీ ఘన నివాళులర్పిస్తాం!

- నల్లూరి రామారావు

   ఒక సీనియర్ స్వచ్చ కార్యకర్త

   29.10.2024