పర్యావరణ ధ్వంసకమవుతూ - కేవలం ఒక్కసారి వాడేసే ప్లాస్టిక్కులు ఇంకెంత కాలం?
3702* వ నాటి రహదారి సుందరీకరణ దృశ్యాలు చూద్దాం రండి!
శనివారం(3-1-26) వేకువ 4. 15- 6.20 నడుమన అవనిగడ్డ బాటలోని బళ్ల సుబ్బ నాగన్న ఆశ్రమానికి దక్షిణ- ఉత్తర దిశల్లో 2 కిలోమీటర్లకు 37 మంది బాధ్యతలు పరిమితమైనవి!
చల్లపల్లి స్వచ్ఛ కార్యకర్తల కృషి ఏ పూటకాపూట నవనవోన్మేషమే గాని, ఈ వేకువ అది క్రొత్త పుంతలు తొక్కింది, గత దినాలకు భిన్నంగా సాగింది!
3-4 కిలోమీటర్ల బారునా పరచుకొన్న వరి ఊక అందుకు కారణం! అందుకనుగుణంగా ఈ 37 గురూ 3 ముఠాలుగా చీలారు! చీపుళ్లూ, డిప్పలూ, అందుకొన్న 17,9 మంది కాసానగర్, చల్లపల్లి వైపుగా ఊడుస్తూ- పొట్టు ప్రోగులు ట్రాక్టర్లో లోడు చేస్తూ చెరో కిలోమీటరు- అంటే, అటు NH 216 దాకా, ఇటు పోతురాజు గుడి దాకా వీర విహారం చేశారనుకోండి!
వీరిలో 11 మంది మహిళా కార్యకర్తలున్నూ! సొంతానిక్కాక ఊరి కోసం చేసే శ్రమదానంలో మళ్లీ పోటీలు కూడ! (- ఊడ్చే వాళ్లకూ, ప్రోగు లెత్తే వాళ్ళకూ!) సమయం 6.00 ఐపోతున్నదనీ, విజిల్ మ్రోగే ముందే మిగిలిన 50 గజాల కాసానగర దారి శుభ్రత పూర్తి గావాలనీ వాళ్ళ హడావిడి చూశారా? ఆస్పత్రి నర్సు జ్యోతి చీపురుతో ఎందుకలా పరిగెత్తుతున్నదో ఆలోచించారా?
3 వ బ్యాచ్ ది కత్తి- దంతెల పనన్నమాట ! ఇక్కడ కూడ ఒకాయన ‘ తెల్లారి పోయింది - కబుర్లాపి, గడ్డి చెక్కే పని చూడండని కేకేస్తున్నాడు! ఇంకో వణిక్ప్రముఖుడు పెద్ద గోనె సంచీడు ప్లాస్టిక్- గాజు తుక్కులు ఏరడం పూర్తి చేసేశాడు! మొత్తానికి అనుకొన్న మేరకు ఎవరి పనులు వాళ్లు పూర్తి చేశారు!
మరి- ఈ వివరాలు చదువుతుంటే పాఠకులకు ఏమనిపిస్తున్నది?
నాకైతే :
“పరుల కోసం పాటుబడని నరునిజన్మం దేనికనీ?
మూగ నేలకు నీరందించని వాగు పరుగూ ఎందుకనీ....” అనే సి.నా.రె, గజల్ గుర్తొస్తున్నది! “పరోపకారార్థమ్ ఇదమ్ శరీరమ్” అనే సంస్కృత నానుడి గుర్తొచ్చింది!
- ఆశ్రమంలో సమీక్షా సభలో :
1) సజ్జా ప్రసాదుగారి నినాదాలూ,
2) లంకె సుభాషిణి గారి మిర్చి పంపకమూ,
3) మరొక 5,000/- గుప్తదానమూ,
4) రేపటి శ్రమదానంకూడా అవనిగడ్డ రాహదారిలోననే సంగతీ ప్రధానాంశాలు!
ప్రజారోగ్యం బాటపట్టీ
పదవి దర్పం వదలిపెట్టీ, ప్రథమ మహిళను మాట మరచీ
పదవి ఉన్నా లేకపోయిన ప్రజారోగ్యం బాటపట్టీ-
పైట దోపీ, బారు జడతో – పట్టుదలతో దంతె పట్టీ
పైడిపాముల వారి కోడలు స్వచ్ఛ సేవకు వచ్చె నదిగో!
- నల్లూరి రామారావు
ఒక సీనియర్ స్వచ్ఛ కార్యకర్త
03.01.2026
