పర్యావరణ ధ్వంసకమవుతూ - కేవలం ఒక్కసారి వాడేసే ప్లాస్టిక్కులు మానేయక తప్పదు.

ఈ సోమవారపు (20-4-26) శ్రమదాన కథ! – @3809^*

               ఈ కథాస్థలం12 వ నాడు కూడ పాగోలు రహదారే! కథాకాలం వేకువ 4.17 - 6.05; రచయిత్రీ రచయితలు 30 మందికి పైగా :

               ఉబుసుపోకకు వ్రాసే - చదివే కథ కాదిది; తమ లక్ష్యసాధనకై వేల కొద్దీ రోజుల నాలుగున్నర లక్షల పనిగంటల - చెమట పోతల కథ ఇది! ఎందరో ఇతర గ్రామాల వారిలో స్ఫూర్తి రగిలించి, సామాజిక సత్కార్యాలకు పురిగొల్చిన మన సమకాలిక కథా రత్నమిది!

               చల్లపల్లి పరిధి దాటి - పొరుగున పాగోలు బాటలో 12 రోజులుగా ఒక వంక స్వచ్ఛ కార్యకర్తలూ, మరో వైపున ట్రస్టు కార్మిక సోదరులూ చీపుళ్ళతో తుడుస్తున్న - కత్తులతో గడ్డినీ, పిచ్చిమొక్కల్నీ, వంకర చెట్ల కొమ్మల్నీ తొలగిస్తున్న - అంటే రహదారిని సుందరీకరిస్తున్న – ఏరోజుకారోజు సంతృప్తి పొందుతున్న ఈ సజీవ శ్రమ గాథలో:

- 15 వేల కిలోమీటర్ల దూరాన నివసించే ఒక నాదెళ్ల సురేష్ పాల్గొని, తన గ్రామ సామాజిక ఋణభారం దించుకొన్నాడు!

- 86 ఏళ్లు దాటుతున్న పశు వైద్యునితో సహా ముగ్గురు వైద్యులు శారీరక శ్రమకు పాల్పడ్డారు!

- నర్సులు తుక్కు డిప్పలు, చెట్ల కొమ్మలూ మోశారు!

- కొందరు మొక్కలకు పాదులు త్రవ్వారు!

- దారిని సింగిల్ యూజ్ ప్లాస్టిక్ వస్తురహితం చేశారు!

               6.10 నుండి మంచి కాఫీలు సేవించారు! స్వచ్ఛ కబుర్లాడుకొన్నారు! అందరూ రోడ్డు వార నిలబడ్డారు! అప్పుడందుకొన్నారు అడపా వారు మైకును - స్వచ్ఛోద్యమ ఆశయాల సారమైన నినాదాలను వారు ప్రకటిస్తుంటే కార్యకర్తలంతా పునరుద్ఘాటించి, గురవయ్య గారి సూక్తులాలకించారు!

               ఈ 100 నిముషాల కార్యక్రమాన్ని చూస్తూ DRK గారు అనందం దాచుకోలేకపోయారు!

               రేపటి శ్రమదాన నిమిత్తం ఇదే పాగోలు బాటలో కలవాలని నిర్ణయించారు.

                    నిర్వచనం దొరికిందా?

ఎక్కడైన – ఎప్పుడైన  ఈ త్యాగం చూశామా!

ఇన్ని వేల దినాలుగా ఎవరైనా శ్రమించారా!

స్వార్థానికి చరమ గీతి చప్పుడు వినిపించిందా?

పరోపకారాని కిచట  నిర్వచనం దొరికిందా?

- నల్లూరి రామారావు

   ఒక సీనియర్ స్వచ్ఛ కార్యకర్త

  20.04.2026